Xirribit (Txikifolk)

XIRRIBIT, EUSKAL BARROK ENSEMBLE – TXIKIFOLK

Ikuskizuna euskeraz.

Euskal Barrok Ensemble, batez ere, errenazimentuko eta barrokoko musikak interpretatzen dituen taldea da. Ia 20 urte daramatza mundu erdiko eszenatokietan barrena. Era guztietako agertokiak zapaldu ditu, Vienako Kontzerhaus (Austria) entzutetsuetatik, Beteluko (Nafarroa) hirugarren adinekoentzako egoitzaraino.
Euskelea izeneko bere lehen lana ipuin musikatua da, Juan Kruz Igerabideren letrarekin eta tradizioko eta eskuizkribu zaharretako musikekin, eskuizkribu horietan ezkutatutako melodia preziatuen bidez instrumentu zahar eta tradizionalak hurbiltzen dituzte, publiko guztien gozamenerako.

Oraingo honetan, Aintzina Folken, bere ipuin musikatu berria entzuteko aukera izango dugu; Euskeleleko Xirribit izeneko lagun bat aurkeztuko digu eta izaki zein kontakizun zoragarriez hitz egiten diguten istorioak eta musikak aditzera emango dizkigute. Guzti hau, berriz ere, Juan Kruz Igerabideren hitzetan eta Euskal Barrok Ensembleren musikarekin.